20 Jahre Säli Linde

- Ein Baum erzählt seine Geschichte -

Liebi Sälizünfter, liebi Gäst

Darf eg mi vorstelle? Mi Name esch Linda Bäumle, die berühmti Sälilinde vo Olte.

Eg freue mi sehr über öiche Bsuech höt.

Wie stolz beni gsi, wo eg als öiche Zunftboum am 10. September 1994 pflanzt worde be. Das esch amene Säli-Herbstbott gsi ond die tolli Idee esch vo de Wagebauer cho. Als ganz chlises Bäumchen bin eg denn vorsichtig do am Aarebord pflanzt worden. Langsam hani me e der Zwöscheziit dörfe entfalten ond e Himmel ufe wachse. Lueget nor, was förne grossi, majestätischi Krone eg scho ha!

Mitgholfe het secher, dass ihr, liebi Säli-Zünfter regelmässig im Vorbeigo dra dänket, me met so speziellem gälbem Düngesaft z’bewässere. Zwar esch das Wässerli ned emmer grad wohlriechend, mängisch meini ich fascht sogar echli Jägermeisterduft drin wohrz’näh…..

Aber vöu lieber esch mer dä Geschmack, als dä grässlichi Wuhrmannqualm, wo jeweils am Donnstigobe vo dere Tür da vis a vis zu mer übertreiht wird. E emmer düster schwarzkleideti Gstalt verschwindet do jewiils för es paar Stond e däm komische Käller, wo ehn immer e wiiskleideti Frou erwartet. E gloub das esch eine vö öichne Lüüt? E denke, dä übt äuä scho för e kommendi Gruselball e der Schützi, so wie dä usgeseht….

Apropos Gruselball. Also e muess scho säge, öichi junge Zünfter hei scho mängisch gspässigi Idee. Jetzt heit der so wunderschöni, knackigi ond flotti Frou be öich e der Zunft ond jetzt sölle sech die verunstalte ond als Geischter oder Vampire verkleide?? Hmmm, Eg weiss de ned…. Naja, Häxe würde jo mängisch scho zo dene passe, aber do sägi jetzt lieber nüt derzue.

Fotos vom Apéro mit Linda Bäumle findet ihr hier!